Emisioni investigativ “STOP” ka zbardhur sot një mitmarrje me zyrtarë të Policisë së Shtetit.
Pas konflikteve me dadon e vajzës, gruaja denoncuese kërkoi ndihmën e policisë së komisariatit nr.4. Në këtë moment, Specialisti i Krimeve Ramazan Hoxha, kërkoi 1000 euro për të ndihmuar mamanë e vajzës që të rimarrë vajzën, por pas gatishmërisë për t’ia dhënë këtë shumë, specialisti i krimeve i kërkon dhe 500 euro të tjera.
Pas kërkesës tjetër për para, gruaja lidhet me emisionin investigativ “STOP” dhe vendos kamera. Komunikimi tjetër që pati me specialistin e krimeve Ramazan Hoxha, është filmuar dhe u transmetua mbrëmjen e sotme. Në këtë filmim shihet “pazari”, për të ulur pagesën shtesë 500-euroshe nga ana e gruas denoncuese me punonjësit e “Policisë që duam”.
Sipas njoftimit të Policisë së Shtetit të dy punonjësit e policisë janë pezulluar nga detyra me urdhër të Drejtorit të Policisë së Shtetit. Ndërkohë SH.Ç.B.A. ka nisur hetimin penal dhe pritet arrestimi i tyre.
